नेपालको संविधान जारी भएको आठौं वर्ष पूरा भएको अवसरमा आज देशभर विभिन्न कार्यक्रम आयोजना गरी संविधान दिवस मनाइँदैछ। यस अवसरमा सरकारले देशभर सार्वजनिक बिदा दिएको छ। काठमाडौंको सैनिक मञ्च टुँडिखेलमा विशेष समारोह आयोजना गरिएको छ, जसमा राष्ट्रपति, प्रधानमन्त्री लगायत उच्च पदस्थ अधिकारीहरूको सहभागिता रहेको छ। संविधानले संघीय लोकतान्त्रिक गणतन्त्रलाई संस्थागत गरेको छ र नेपाली नागरिकहरूमा नयाँ आशाको सञ्चार गरेको छ। विभिन्न राजनीतिक दलहरूले यस दिवसलाई राष्ट्रिय गौरवको रूपमा मनाउन आह्वान गरेका छन्।